Իրավագետ Արտաշես Խալաթյանի կարծիքով՝ Ռուսաստանի Դաշնության ԱԳՆ ներկայացուցիչ
Մարիա Զախարովան իր հայտարարություններով արդեն երկար ժամանակ է, ինչ խախտում է դիվանագիտական
վարվելակերպի բոլոր կանոնները, և Հայաստանը պետք է ոչ թե պոլեմիկայի մեջ մտնի վերջինիս
հետ, այլ, օրինակ, բողոքի նոտա հղի ՌԴ ԱԳՆ-ին։ Զախարովան ներկայացնում է ոչ թե իր անձնական,
այլ Ռուսաստանի պաշտոնական տեսակետը։ Իսկ Արմեն Գրիգորյանը, ըստ Խալաթյանի, արտահայտում է ճշմարտությունը, որը վաղուց հայտնի
էր հայ փորձագետներին, իսկ հանրությունը ենթագիտակցորեն էր զգում։ Ռուսաստանը, Խալաթյանի
կարծիքով, առաջին անգամ չէ, որ երկրորդում է ադրբեջանական թեզերը, նրանք ուղիղ ձայնակցում
են Ադրբեջանին, ինչը բխում է ռուս-ադրբեջանական ռազմավարական համագործակցության մասին
2022 թվականին կնքված հայտարարությունից։
«Կարծում եմ՝ Հայաստանն ավելի շուտ արձագանքողի դերում
է, քան նախաձեռնողի կամ կոնֆլիկտ սադրողի։ Քանի որ իրադարձությունները զարգանում են կայծակնային արագությամբ, և մենք պատերազմից հետո
մոտ 2 տարի ուշացրել ենք մեր պետական քաղաքականությունը հետպատերազմական իրողություններին
համապատասխանեցնելու առումով, դրա համար մեզ մոտ ամեն ինչ ստացվում է գերարագ ռեժիմով,
երբեմն սպոնտան, բայց ժամանակը չի սպասում։ Մինչև տարեվերջ շատ լուրջ զարգացումների
պետք է սպասենք, և ես Արմեն Գրիգորյանի հայտարարությունները կդիտարկեմ Ալեն Սիմոնյանի՝
Լատվիայում արած հայտարարությունների հետ կապված։ Կարծում եմ՝ այս երկու հայտարարությունները պետք է համադրության մեջ դիտարկել»,- ասաց Խալաթյանը՝
նկատի ունենալով Սիմոնյանի այն հայտարարությունը, որ մոտ ապագայում, իր կարծիքով, ԵՄ-ին
անդամակցելու հարցով հանրաքվե կունենանք, որին, իր վստահությամբ, ժողովուրդը «այո»
կասի։
Անդրադառնալով Արցախից ռուս խաղաղապահների
հեռանալուն՝ Խալաթյանը նշեց, որ դա տեղավորվում է ռուս-թուրք-ադրբեջանական հարաբերությունների տիրույթում,
քանի որ ՌԴ-ին օդ ու ջրի պես պետք է Թուրքիայի
մասնակցությունը պատժամիջոցների շրջանցման գործում։
Զախարովայի՝ պաշտոնական Փարիզի
քայլերի վերաբերյալ հայտարարության մասին իրավագետը նշեց, որ Ռուսաստանի տեսանկյունից
տարածաշրջանում պետք է թույլ Հայաստան, իսկ Ֆրանսիային ձեռնտու է ուժեղ Հայաստանը՝
որպես պլացդարմ Ռուսաստանի և Թուրքիայի ծավալապաշտական քաղաքականությանը հակազդելու
համար։
Մանրամասն՝ տեսանյութում
Վովա Հակոբյան
